domenica 3 dicembre 2017

IL "TEATRI STABIL PE LENGHE FURLANE" RECLAMÂT DA BEPI AGOSTINIS AE SECONDE CONFERENCE REGJONÂL SU LA MINORANCE LINGUISTICHE FURLANE


 
SECONDE CONFERENCE REGJONÂL

SU LA TUTELE DE MINORANCE

LINGUISTICHE FURLANE

 
"Conference regjonâl su la aplicazion
de leç regjonâl 29/2007  e previsions futuris" 

Vinârs il 1 di Dicembar 2017

(prime zornade) 



INTERVENT

di BEPI AGOSTINIS



IL TEATRI STABIL FURLAN:

CUANT SARAIAL UNE REALTÂT?

 
Un salût a ducj i components di chest incuintri e in particolâr a ducj chei che a son impegnâts e che si impegnaran tai 4 grups di lavôr.

O pensi che cheste ocasion par me e sedi, forsit, la plui impuartante e o speri ancje la plui costrutive; daspò tancj intervents che o ai fat par cheste mê lungje bataie, parcè che il Friûl al vedi un so Teatri Stabil in maniere esclusive pe lenghe furlane.

A son 30 agns, o dîs 30 agns, che o scombat.

In curt cualchi date impuartante. Prime o ai tentât cun diviers politics dal moment che o cjatavi a Udin, ma simpri cun promessis e mai mantignudis. Tal 2003 un gno prin impuartant intervent fat tal salon dal cjistiel a une cunvigne organizade a Udin dal sindic Sergio Cecot, cu la presince dal president Illy, dulà che i ai spiegât il parcè di un Teatri Stabil furlan. Cence nissun esit.

Tal 2006 o ai consegnât al President dal Consei Regjonâl Tesini cuasi 4500 firmis parcè che il Friûl al vedi il so Teatri Stabil.
 
Firmis cjapadis sù, cuant che mi presentavi a lis manifestazions che si fasevin a pro dal Friûl, in particolâr tal Congrès e te fieste de Fraie de Primevere inmaneadis de Filologjiche che mi è stade simpri dongje in cheste mê batie, prime cul President Pelizzo e daspò cul president Vicario.

No jeri bessôl, mi jerin vignûts in jutori, par cheste mê batie, lis trê Provinciis, che an firmât la petizion pal Teatri Stabil furlan, cul jutori dal president Marzio Strassolt, che al veve capît la impuartance di cheste mê richieste; daspò al à firmât il retôr de Universitât di Udin che, in chei agns al jere retôr Honsell, dopo la retore Compagno, naturalmentri la Societât Filologjiche, e di cuant che je nassude ancje l'Arlef. Lis petizion dai sorestants, consegnadis adun a lis firmis al president Tesini

Tai incuintris che o ai fat, mi soi simpri presentât cu la mê lenghe, cussì ancje al incuintri cu la VI Comission de culture regjonâl a Triest, consegnant a man la traduzion par talian, ma ae fin mi àn dite che o vevi fevelât cussì clâr che a vevin capît dut cence vê bisugne de traduzion. Ma in che volte, a part l'interessament di Violino e di Franz che a jerin conseîrs te maiorance, ma i lôr aleâts di drete no sintivin di chê bande, e chest mi è sucedût ancje cu lis Zontis di çampe.

Cui agns o ai continuât, cui diviers assessôr regjonâi ae culture che o cjatavi, fin al ultin l'assessôr Torrenti che mi veve proponût, une sede stacade dal Teatri Stabil dal Friûl V. J., par une compagnie Stabil pe lenghe furlane, cun sede al Teatri Zuan di Udin dulà che jo o vevi za fevelât sedi cul President Vidali che cul Diretôr artistic Bevilacqua che a vevin acetât la mê propueste di logâ il Teatri Stabil furlan tal lôr Teatri.

La propueste dal assessôr mi podeve lâ ben, al pat che cheste gnove entitât e fos indipendente di Triest, sedi come, direzion, organizazion, progjets e soredut i finanziaments. Chest il progjet proponût daspò cirche 4 agns dal prin incuintri cul assessôr, daspò cidin.

Par vie traviersis o ai savût che ae fin, forsit, il Stabil di Triest, al varès dât un contribût par un spetacul. Jo o ai dit , a colp di no !, che la caritât no le aceti, la mê dignitât di furlan, o pensi a non di ducj i furlans, no podevi acetà une cundizion di sotanance.

Cumò voi indenant su la mê strade ancjemò plui cjariât, e ancjemò plui convint che chel che o domandi al è un nestri dirit.

Cumò, o spieti la prossime zonte regjonâl.

Tai ultins agns un jutori impuartant lu ai vût dal president de Provincie di Udin Pieri Fontanin, che cun Lui, almancul, par doi agns o ai vût la sodisfazion di presentâ, cu la compagnie de “Farie Teatrâl furlane” cun atôrs professioniscj dal teatri, doi spetacui te nestre lenghe al Teatri Zuan di Udin, cul plenon, cun grant sucès di public.

Chest gno Teatri Stabil, al varà di jessi il puartevôs sul plan regjonâl, nazionâl e internazionâl de culture e de civiltât furlane, sedi cul lavôr sul palc di sene, sedi cun altris ativitâts culturâls: leturis, incuintris, dibatiments, conferencis simpri di caratar culturâl, un rapuart teatri scuele, un Teatri pal mont dal lavôr, ma fat cu la serietât dal professionisim.

Ven a stâi un Teatri pe pupilance e la valorizazion de lenghe.
 
Cheste gnove realtât, no sarà mai une aziende comerciâl dome par produsi spetacui pal incàs, ma e à di vê une funzion sociâl e culturâl, refudant un teatri di aparence, ma al varà di jessi un teatri di pinsîr, e dome cussì al podarà jessi pardabon un teatri nassût pe valorizazion de nestre lenghe, espuartant il nestri teatri no dome in Italie ma ancje tal forest.

Cuant che o disevi chestis robis, cualchidun mi riduçave, ma crodêtmi, par une mê esperience personâl in Bielorussie a Minsk, cualchi an in daûr, o vevi presentât un spetacul par talian cu la mê regjie, realizât su domande de Universitât di Udin, il public al jere une vore atent, sedi tes part seriis, sedi cuant che al jere di ridi, e a ridevin, chest al voleve dî che a capivin; e chest al varès podût sucedi ancje se il lavôr al fos presentât par furlan, e jere la recitazion che a faseve capî il dut.

Cun chest Teatri Stabil nol vûl dî sierâsi tal nestri mont, ma vierzisi al Teatri nazionâl e internazionâl, al varà di jessi un Teatri di rinovament, e cussì ancje pai nestris dramaturcs che si sintaran, plui impegnâts tai lôr lavôrs, che a no saran scrits dome pes nestris pûr bravis filodramatichis, ma se valits, a podaran saltâ fûr ancje dai nestris confins, e o pensi, cuntune plui grande sodisfazion par lôr.

Chei che a jerin cuintri, ancje furlans, a disevin che in Friûl o vin za il Teatri Stabil dal Friûl Vignesie Julie, che al bastave, e po, ma cuâl teatri furlan? mi domandavin. O ai simpri ribatût ancje a mieç de stampe locâl, che mi jere avonde dongje, confermant che nô no sin cuintri dal Stabil di Triest, juste che al sedi ; come ancje il Stabil Sloven, come Teatri di citât di frontiere, just.

Ma a Triest no vevin avonde di Teatris Stabii, cussì a àn volût e otignût un Teatri Stabil pal dialet triestin “la Contrada”, par difindi la lôr identitât. Juste!!!

Ma no saressial just che ancje il popul furlan al vedi un so teatri?

Cussì, ancje nô o varessin i contribûts nazionâi, par fâ lis robis cun serietât professionâl, come ducj i Teatris Stabii talians.

E nô, invezit, parcè vino di jessi simpri sotans. Come popolazion mi somee che sedi plui numerose di chê triestine, e soredut, une robe che lôr no àn , o vin une lenghe minoritarie ricognossude dal Stât. Ma parcè a Triest a otegnin dut chel che al rivuarde i lôr interès, e nô furlans o restìn tal complet cidinôr. Ma te Zonte Regjonâl, i furlans sono in minorance come numar di elets? No mi pâr! (podìno clamâju rapresentants dal popul furlan ?), no crôt.

Duncje, cumò o spieti la prossime zonte regjonâl, no mi interesse il colôr politic, tant o ai za viodût che sedi di drete che di çampe, no àn mai sintût il probleme. Jo o speri che i gnûfs elets a vedin plui a cûr i problemis pal popul che ju à elets, e come che o vevi za dite, chest Teatri Stabil al nas ancje par une valorizazion e par dâi plui dignitât ae nestre leghe.

Prime di finî us disarai une curte poesie di Garcia Lorca, par fâus capî la impuartance de lenghe par un popul, parcè o vês di capî, par chei che no lu san, che nô o sin un popul parcè che o vin la nestre lenghe e se la pierdìn no sarìn plui un popul.

LA LENGHE Garcia Lorca

Graciis de vuestre atenzion e pazience, e che i components di chescj grups di lavôr a cjapin a cûr cheste me richieste, ma soredut i politics che o larìn a elei. Un mandi di cûr a ducj voaltris.
        

Bepi Agostinis



Udin, 1° di Dicembar dal 2017”
 
...........
 
Un gracie a Bepi Agostinis pe sô costance in cheste lungje bataie ancjemò no vinçude e par vênus mandât il test del so intervent che o publichin cun grant plasê.
 
 
La Redazion dal blog


6 commenti:

  1. "Chei che a jerin cuintri, ancje furlans, a disevin che in Friûl o vin za il Teatri Stabil dal Friûl Vignesie Julie, che al bastave, e po, ma cuâl teatri furlan? mi domandavin." BEPI AGOSTINIS

    Commento:

    E' ovvio che la battaglia è esclusivamente politica, come politica è la battaglia della tutela della minoranza linguistica friulana. Battaglia che sarà sempre persa finchè le redini delle scelte politiche friulane saranno nella mani di politici telecomandati da Trieste, da Milano e Roma...

    RispondiElimina
  2. Graziis Bepi, pal tio grant impegn di lungje durade. Va indenat. Tu sos tu tal just. No chei ch'a non sintin.
    Ogni ben e mandi

    RispondiElimina
  3. La bataie pal teatri stabil furlan e je une bataie sacrosante: al è un dirit dal popul furlan vêlu chest teatri!

    Cuant rivarino a vêlu?

    O ise dome Triest a vê il dirit di vê plui di un teatri stabil?

    RispondiElimina
  4. "Il teatri stabil di Triest al à dite ch'al vares dat un contribût....."
    Si, cui bês da li tassis dai furlans.E nus menin ancje pal cûl.
    Mi ven ingomut

    RispondiElimina
  5. 20 milions di euros cjatâts intun dopomisdì de Zonte regjonâl par taponâ la buse di bilanç del teatri liric Verdi di Trieste; 30 agns di batais de comunitât furlane par vê un so teatri stabil furlans e ancjemò la rispueste de politiche regjonâl e je negative.

    Chest il risultât di vê zontât Triest (un buse di citât la jù in font dongje la Slovenie) ae regjon storiche Friûl...

    RispondiElimina
  6. E l'assessôr regjonâl ae culture, Gianni Torrenti, triestinon, al è un om di teatri....teatri triestin, che al sedi ben clâr, sarès a dî IL MIELA di Triest che lu à vût par agns President.

    Par fuarce che al dîs No al teatri stabil furlan...

    Vustu mai vê ancje un teatri furlan che al puarti vie alc di bêçs ae lungje rie di teatris triestins, ducj finanziâts cui bêçs dai citadins talians e furlans....

    Prime contentâ i triestins e se al reste cualchi fruçun, forsit alc al rive ancje ai furlans...

    Si puedial lâ indenat cussì?

    RispondiElimina