martedì 31 gennaio 2012

RADIO ONDE FURLANE: E JE TORNADE LA TRASMISSION "INTERNAZIONALITARI" !




Dopo un an e mieç
e je tornade la trasmission radiofoniche

“INTERNAZIONALITARI”

inmaneade da

RADIO ONDE FURLANE


“Dopo di cuasi di un an e mieç di sospension, adun cun chê radiofoniche, e torne a partî ancje la version internet di Internazionalitari, il boletin di informazion par furlan su lis nazions cence stât e su lis comunitâts minorizadis de Europe. La decision di suspindi il program e il blog e jere stade cjapade par vie des dificoltâts finanziaris di Radio Onde Furlane dopo che la Regjon e veve azerât par doi agns di file i fonts pai programs radiotelevisîfs par furlan. Cumò alc al è cambiât e si à decidût di tornâ a scomençâ cu la trasmission e, di chê strade, ancje cul blog che, pe ocasion, si presente ancje cuntune gnove muse e cun cualchi contignût in plui. Sperìn che il nestri sfuarç al sedi preseât.”

Radio Onde Furlane
Carli Pup

----------------------------

Ve ca la puntade di martars
ai 31 di Zenâr, a 11 di matine

Cjaris amiis e cjârs amîs,
us ricuardi che doman, martars ai 31 di Zenâr, a 11 di matine e larà in onde une gnove pontade di Internazionalitari. O podarês scoltâle ator pal Friûl sui 90 Mhz di Radio Onde Furlane o ben vie streaming dal sît de stesse emitente, baste lâ su http://www.ondefurlane.eu/ e o cjatais daurman il leam par scoltâle de rêt. La repliche e je invezit in program miercus prin di Fevrâr a une dopodimisdì.
Po, dentri di miercus di sere, o cjatarês lis gnovis di cheste pontade (e alc in plui) ancje sul blog de trasmission ( internazionalitari.blogspot.com ). Cheste setemane si fevele di:
- Scozie: referendum su la autodeterminazion, consultazions viertis
- Finlande: presentadis lis racomandazions dal Consei de Europe
- Slovachie: sentence cuintri des “classis speciâls” pai rom
- Bretagne: il parê dal Consei Culturâl su la politiche linguistiche
- Austrie: HSK al domande plui cravuat a scuele
- Letonie: vie libare al referendum sul ricognossiment dal rus
- Republiche Ceche: un partît gnûf par difindi i rom
- UE: politichis pai rom, la Comission Europeane e riclame 9 stâts
- Paîs Basc: insegnament dal basc in dute la Navare, no dal Parlament
- Irlande dal Nord: pes autoritâts europeanis e covente une leç sul gaelic
- Irlande: lis associazions pe lenghe cuintri dal gnûf model di finanziament
- Cossovo: scuintris violents sui confins cu la Serbie
- Paîs Catalans: scuintri su la leç pe lenghe tes Baleârs
- Albanie: impresonât un rapresentant de minorance greghe


mandi
 
-------------------------

La trasmission radiofoniche INTERNAZIONALITARI 
 e va in onde il martars a 11 di matine e in repliche il miercus a une di dopomisdì, su Radio Onde Furlane.


Nessun commento:

Posta un commento