venerdì 10 dicembre 2010

GNÛFS LIBRIS PAI FRUTS IN LENGHE FURLANE


GNÛFS LIBRIS PAI FRUTS IN LENGHE FURLANE

Editôr Serling soc. Coop.
www.serling.org


Mape ilustrade “Friûl di Magance” di Luigino Peressini

E ven fûr in chescj dîs la mape ilustrade Friûl di Magance” di Luigino Peressini, pal editôr Serling soc. Coop.
La mape, che si indrece al public dai fruts ma no dome a chei, e presente il Friûl popolât di dutis lis figuris de tradizion popolâr: orcolats, aganis, maçarots, salvans, pagans, cjalcjuts, drâcs, striis...
La sdrume di creaturis dal mont magjic (il mont de “Magance” cemût che al è definît in ciertis flabis furlanis) al fâs dal Friûl un labirint pardabon ingredeât, e al è propit par orientâsi in chest imagjinari popolâr tant ric che e ven publicade la mape, che sul daûr e propon schedis cu la descrizion par furlan des figuris principâls rapresentadis sul devant.
La mape e à un formât di cm. 100x70 e si pues cuistâ intes librariis o li dal editôr (0432 649131, coop@serling.org) al presit di 15 euros.

Luigino Peressini: architet, ilustradôr, al à realizât diviersis storiis a fumuts e mapis ilustradis par aministrazions comunâls (Palme, Manzan, Osôf, Tavagnà, Feagne, Remanzâs...) e pes scuelis, fondant simpri il so lavôr creatîf suntune ricercje filologjiche e une vore precise.


“L’arbul Feliç” di Lussia di Uanis

Al ven distribuît in chescj dîs il libri cun cd-audio “L’arbul Feliç”, di Lussia di Uanis.
Il libri si indrece al public dai fruts za di prime che a ledin a scuele, al è ilustrât cui biei dissens di Elena Chiandussi e al à un cd cu la storie recitade de autore stesse, acompagnade des dolcis musichis origjinâls di Annalisa Masutti, che lis sune cul piano.
“L’arbul Feliç” e je la storie di une semençute che cul passâ des stagjons, e ven sù, si trasforme e compagnade dal passâ dal timp, tra Invier, Vierte, Istât e Sierade, al devente un biel miluçâr, gjoldint di ce che i sucêt e di ce che al à tor ator.
Il libri al à 48 pagjinis, al è in lenghe furlane cu la traduzion, in code, par talian; il cd audio al dure 25 minûts. Si si pues cuistâ intes librariis o li dal editôr (0432 649131, coop@serling.org) cul presit di 20 euros.

Lussia di Uanis: poetesse, artiste, e lavore intal cjamp de istruzion, cun progjets didatics par fruts, prin di dut in lenghe furlane. E à publicât il libri par fruts “Intal sac de fantasie”. Par Radio Onde Furlane e à curât il program “Flabis a mirinde”.

Serling soc. coop.:
posta elettronica: info@serling.org


1 commento:

  1. E dopo a disin che no si publiche nuie in Furlan pai fruts!

    Compliments ai autôrs e ae cjase editore Serling

    RispondiElimina