lunedì 8 novembre 2010

Triest nus gafe ancje la lenghe di Erika Adami

Settimanale “la VITA CATTOLICA” – Sabato 30 ottobre 2010 – EDITORIALE
Je vere che lis dificoltâts no son mai mancjadis, ma la evoluzion de politiche linguistiche regjonâl sul furlan e lasse scaturîts. Dongje dal tai progressîfs des risorsis (ancje dal 100 par cent se o cjalìn ai fonts regjonâi pai programs radiotelevîfs in lenghe furlane su lis emitentis locâls tal 2010) e de mancjade atuazion des leçs in vore, la Zonte Tondo e a decidût di “spachetâ” lis competencis che a stavin sot dal Servizi identitâts linguistichis, culturâls e coregjonâi tal forest de Regjon. In struc, cumò il furlan lu àn spartît tra doi Servizis, che a rispuindin a doi assessôrs (chel ae Culture, Elio De Anna, e chel ae Istruzion, Universitât e ricercje, Roberto Molinaro). Dut chel che al rivuarde la istruzion par furlan, comprendude la aplicazion fondamentâl dal gnûf regolament pal insegnament de lenghe a scuele previodût de leç regjonâl 29/2007, e dutis lis ativitâts relativis ae Universitât dal Friûl, al passe sot dal Servizi Istruzion Universitât e ricercje de Regjon, che al à sede a Triest.
Di no crodi. La lenghe furlane e vignarà gjestide dal cjâf luc julian. Lontan di Udin e dal Friûl. Ce disaressino i triestins se la direzion dal lôr puart le spostassin te sede de Comunitât montane de Cjargne?!
Cuale ise la strategjie di azion? Cence volê viodi mâl par fuarce, al è però dificil pensâ che al sedi un ben che la politiche linguistiche sul furlan no sedi plui unitarie, cun dut che i sogjets interessâts a puedin ancje coordenâsi. Significatîf, po, il fat che il Silce, cui cambiaments te organizazion regjonâl a tacâ dai 16 di Otubar, al sedi deventât Servizi coregjonâi tal forest e lenghis minoritariis. Che no nus vegnin a dî che la “inversion” dai setôrs al è un câs. Achì, la forme e je sostance. Il guvier regjonâl al met sul plat lis sôs prioritâts. Dal rest, Tondo no lis a mai scuindudis - al a vût dit plui voltis che il furlan nol è une prioritât -, e maravee, però, che no disi nuie la fuarce politiche de maiorance che de promozion e tutele de lenghe e a fat une bandiere.

Dificil pensâ po di meti in pîts azions eficacis di politiche linguistiche se i stes organisims preponûts a metilis in vore a son cence bêçs e cence personal (comprendût il diretór). Al è il câs de Agjenzie regjonâl pe lenghe furlane, in spiete di capî dal assessôr competent De Anna cuâl avignî che e a devant.

Di Molinaro, invezit, i furlans si spietin che al meti il pît sul aceleradôr de machine che e puarte ae metude in vore de leç sul furlan, la 29/2007, par chel che al inten l'insegnament de lenghe a scuele, parcè che, si sa, il furlan si lu salve dome tes scuelis (si ben che dome une ore par setemane al è pôc plui di nuie). Il regolament pe atuazion de Ieç al è stât burît fûr ae metât di Lui de comission permanente competente, ma nol è stât puartât in discussion di nissune bande. O restìn in spiete di viodi vignî indevant fats concrets.
Simpri che e sedi la volontât.
Erika Adami

1 commento:

  1. Simpri su La Vite Catoliche, la sabide dopo, l'assessôr Molinaro al à rispuindût a chest editoriâl scrit e firmât de gjornaliste Erika Adami. Une rispueste che no mi contente par nuie. Ma i politics pensino pardabon che i Furlans a sedin ducj stupidei e sotans?

    RispondiElimina